政界名人每逢農曆新年都會寫揮春向市民拜年，邊個係「書法派」，邊個係「速成派」即時現形。「書法派」猛人有好多，議員首推廿年功力嘅工聯會王國興，官場就有運輸及房屋局局長鄭汝樺（Eva）、商務及經濟發展局局長劉吳惠蘭（Rita）及民政事務局副局長許曉暉（Florence），三人各自揮毫寫揮春，向市民拜年。
Eva同Rita等女高官多年前一齊跟名書法家高雲州學習書法，至今學有所成。Eva好有心思，即席寫咗副對聯畀「紫氣東來福滿堂，紅光日照暖萬家。」同廣大市民拜年，祝大家安居樂業，出入平安，身心康泰，龍精虎猛！
Rita都用楷書寫咗兩對對聯同一個「福」字，其中一副係：「天增歲月人增壽，春滿乾坤福滿門。」不過Rita謙稱寫得麻麻哋，因為高老師中風後，習字已無人督促及提點。Eva準備新年登門探望高老師，做一個尊師重道嘅學生。
Florence都即席露幾手寫咗個「福」字，又用篆書寫咗「如意吉祥」四個字，原來Florence讀小學時已到街坊會學習國畫同書法，讀大學時跟過唔同書法老師，畢業後先至暫停習字，擺低咗十幾年，但今次寫番並無生疏到。
