本文重點
農曆新年假期又係旅遊旺季，政商界名人紛紛外遊，呢兩日機場貴賓出入口車水馬龍，相當熱鬧。早前去完東非狩獵嘅全國政協常委陳永棋，尋日又出發去澳洲墨爾本展開自駕遊之旅。棋哥話，佢年輕時夢想自駕遊晒全美國，但因為工作忙一直無機會去，到依家更加無機會，因為度度地方都檢查嚴密，治安又唔好，所以改去澳洲。
Ｄ姐為見識闖伊朗
中華廠商聯合會會長黃友嘉同棋哥同聲同氣，同樣去澳洲旅行，佢話同太太玩幾日輕鬆吓，希望有機會玩樹熊喎！
人稱「Ｄ姐」嘅公務員事務局局長俞宗怡尋日都現身機場，佢仲有冒險精神，旅行唔係去法國巴黎Shopping，而係約埋十幾個朋友勇闖政局較亂嘅中東伊朗，佢話希望去見識吓喎，臨上機前不忘祝市民新年進步，工作順利！
尋日中午時分，卓妮仲分別見到行政會議成員劉江華夫婦同立法會議員林健鋒（Jeffrey）夫婦到機場貴賓室入閘，劉江華話同太太去上海玩幾日，佢太太係廉政公署社區關係處助理處長，但見到鏡頭即避，原來廉署保密程度係密實得咁緊要嘅！Jeffrey兩公婆就飛去泰國曼谷旅行叉電，講明要食好嘢，特別係泰國出名嘅魚翅，佢幫襯開曼谷嘅「傑魚翅」，當地嘅意大利菜同法國菜一樣頂呱呱。
雖然普遍名人外遊為咗輕鬆吓，但有啲就為咗去探仔女。自由黨田北辰夫婦前日已啟程去美國紐約探望女兒，前行會成員范鴻齡（Henry）亦飛到美國探望仔女，但會先到溫哥華探朋友，順道欣賞冬季運動會賽事。Henry係寧波人，問佢有乜新年習俗？Henry就話寧波家鄉每逢年三十晚要食「湯團」（芝麻湯圓），寓意團圓好意頭嘛！
至於立法會「五散人」嘅林大輝同譚偉豪會喺農曆年外遊，日前佢地五個排排企向市民拜個早年。
卓妮