晨早起床，梗係去廁所解決小問題㗎啦，小解完畢，拉水一沖，咁就浪費咗一缸珍貴淡水。

隔咗一陣，少不免又要解決大問題㗎啦，大解完畢，拉水一沖，咁又浪費咗一缸珍貴淡水。

一旦放假，當然會有好多時間留喺屋企不斷解決問題㗎啦，一次又一次沖水，一次又一次浪費。

大家可能會質疑功夫茶，做乜咁唔環保呀？搞乜唔用鹹水沖廁？功夫茶就會好無奈咁同大家講，有頭髮冇人想做瘌痢，非不為也，實不能也，皆因寒舍位於香港其中一個冇鹹水供應嘅社區，迫不得已惟有用淡水，唔通去完廁所唔沖咩！

講到呢度，唔知大家認唔認同一個觀點，特區政府嘅環保政策完全得把口。呢嗱，唔好以為功夫茶咁黑仔，住正一笪冇鹹水供應嘅山旮旯鬼地方，查實全香港仲有好多同病相憐嘅「環保難民」，譬如南區，譬如屯門，譬如元朗，譬如西貢，當然仲有離島，人數多達一百三十萬。多年以來，政府始終冇痛定思痛接駁鹹水管沖廁，任由彌足珍貴嘅淡水沖落鹹水海，每年浪費八千二百萬立方米。

除咗淡水沖廁係環保不正確，環境局局長邱騰華似乎又發雞盲睇唔見無處不在嘅烏煙瘴氣。即係咁，係人都知道汽車排放廢氣係造成氣候暖化嘅元兇之一，吖，整鬼佢，邱局長竟然從來冇諗辦法減少車輛出出入入，淨係識得推出擾民嘅「停車熄匙」。邱騰華係就係鼓勵市民使用零排放嘅電動車，之不過咁喎，有冇地方畀人充電呀？又以功夫茶屋企為例吖，諗爆頭都諗唔到可以點樣充電，唔通攞條幾百呎長嘅電線由室內插頭一路九曲十三彎駁去停車場？咪玩啦，落雨漏電會死人㗎！

根據環保署資料，香港每年排放高達四千七百萬公噸二氧化碳，平均每人六點七公噸。知唔知全球人均排碳量係幾多？答案係四點四公噸。換言之，香港人排放廢氣比人哋多咗超過五成。

講出嚟真係幾鬼羞家，萬一椰林樹影又水清沙幼嘅馬爾代夫唔覺意因為水位上漲而陸沉，香港人可能有必要負起最大責任，馬爾代夫災民大概會話：係囉係囉，咪就係嗰班唔識得減排嘅衰人害到我哋家散人亡囉！

咦咦咦，咪住先，大家睇睇，負責管理全港大大小小公園嘅康文署用乜嘢施肥？嘩，弊傢伙咯，佢哋居然唔係用有機肥料，用嘅係化學肥料呀！

功夫茶開始懷疑官僚搞環保唔止得把口，甚至唔用腦。你知啦，化學肥料又係另一個破壞環境嘅元兇，用後會令到泥土變酸，而且釋出大量二氧化碳，嚴重影響空氣質素。

呢鋪瓜得嘞，再係咁落去，藍天白雲一定阿崩叫狗愈叫愈走，烏天黑地籠罩全城，香港遲早臭到嘔。計功夫茶話齋，如果邱騰華硬係對於改善空氣污染一籌莫展，執包袱返火星算吧啦，咪鬼阻住地球轉！