金管局前總裁任志剛退休後話要學hea，仲開咗個blog（網誌）諗住繼續寫吓嘢，本來閒時寫吓blog應該冇乜壓力，不過因為佢係任總就好唔同喇，好多人透個佢個blog問咗好多問題，仲不停有人邀請佢去講座，日前就聽聞佢瘦咗四磅，原來係畀人「追到瘦」。
可能因為咁，尋日任總喺blog度公告天下，為好多朋友未收到佢嘅回覆而致歉，仲話真係估唔到，退休生活仍然係咁忙碌喎。嘩！任總講到退而無休，忙到覆唔切咁，擺明晒命啫。任總仲補多句，話會盡快覆番啲提問或邀請，但希望大家明白，佢未必每個邀請都可以接納，何解？佢話除咗時間因素之外，覺得自己唔應該喺香港貨幣金融政策指指點點喎，以免影響政策嘅公信力，違反大眾利益咁話。
咁又係嘅，正所謂「不在其位、不謀其政」，好似前財政司司長梁錦松早前講多咗就即刻畀政府鬧，搞到尷尷尬尬就無謂啦，不如慳番啖氣仲好。