樓價近期節節飆升，連做女醫生嘅，都要打電話上電台烽煙節目發牢騷，投訴買唔起樓。外號「大舊石」嘅立法會議員石禮謙教路，小業主第一次置業，可以選擇價錢較平嘅二手樓或者居屋，佢讚房協出品都唔錯，仲醒條貼士畀大家話，如果有心買居屋，最好揀九五年同九六年興建嘅二手居屋，事關當時樓市仲未好熾熱，喺嗰段時間興建嘅樓宇最有「誠意」，絕對買得過！
身為地產及建造界立法會代表嘅大舊石，講起樓市大把古仔講，猛幫業界賣廣告，話買樓好過買股票喎。佢話，年輕人買樓有兩大好處：第一，對事業有幫助，一諗到自己要供樓十幾廿年，一定畀心機返工，唔會郁啲就辭職唔做，半途而廢。第二，防止自己變購物狂，事關個個月攞咗大半個月糧供樓，女士們買鞋、買手袋都會諗吓先，唔敢亂使錢吖嘛。
大舊石勸人買樓好過買股票，坐言起行。佢話，自己好多年都無買股票嘞，後生時佢試過攞個女嘅利是錢去買股票，自己亦夾少少錢，諗住養金蛋，等佢慢慢生錢，點知有一次遇到大教訓，勁蝕離場，從此斬手指唔再買股。至於「大舊石」嘅說話聽唔聽得過，就大家去判斷喇！