對人民幣自由兌換有保留

早前主力研究中國經濟嘅中大校長劉遵義預計，人民幣最快五年就可以自由兌換，不過，身兼港大經濟金融學院榮譽教授嘅中策集團主席馬時亨尋日再次喺港大開班授徒，人大常委范徐麗泰同會計界立法會議員陳茂波畀面出席，肥亨嘅一番言論似乎對劉校長嘅預測有所保留。

肥亨直話直說，指人民幣有條件自由兌換，唔代表國家已準備去做，佢仲好抵死咁攞太太做比喻，話老婆一直都識煮飯，但可能驚整花個妝或者整亂個髮型，所以唔肯下廚；佢言下之意話，即使人民幣已經有晒自由兌換嘅基礎，但中央作呢個決定時仍要考慮好多因素。至於幾時先係好時機，肥亨都話估唔到喎。

自從中央去年宣布要喺二○二○年將上海打造成國際金融中心後，唔少港人都擔心上海好快迎頭趕上，香港將被進一步邊緣化。肥亨就話，大家睇北京奧運搞得咁成功，就知道中央要做嘅嘢，一定會做到，所以都幾乎可以肯定上海喺二○二○年可以達標成為國際金融中心。不過佢亦向在座學生大派定心丸，話香港同上海嘅形勢唔係一個上，另一個就會落，只要香港保持優勢，兩地其實可以同步發展。