ＣＹ嘅疑似特首競選工程尋日再度啟動，先喺報紙撰文，借馬頭圍塌樓事件，大談香港貧窮問題，早上佢又再出席社聯主辦嘅展望預算案研討會，都係講貧窮問題，佢話問題唔係靠預算案派糖就搞得掂。ＣＹ唔係第一次講貧窮問題，不過，尋日情況有啲唔同，佢順勢踩埋煲呔曾，暗寸煲呔曾摸唔清溫總要香港解決深層次矛盾嘅宏旨。

ＣＹ話，香港貧窮問題特殊，其他有類似問題嘅國家，係中上層收入增長快，基層增長慢，形成貧窮問題，但香港嘅基層，則係收入下跌，貧富差距不斷擴大，呢種現象，ＣＹ畀個名佢，叫「生產與分配矛盾」，即係社會大量製造財富，但基層完全分享唔到，呢樣就係香港其中一個深層次矛盾嘞。

佢舉例，今年經濟唔算特別差，香港總商會仍然要求預算案減利得稅，只會加深呢種矛盾。ＣＹ話，依家唔係時候減利得稅，呼籲總商會應該從社會同政治角度諗多啲；而香港成日有人批評官商勾結，有反商情緒，正正就係由呢種生產與分配矛盾造成咁話。

鬍鬚曾暗寸多嘢講

中央三令五申叫煲呔曾解決香港深層次矛盾，但煲呔曾一籌莫展，連何謂深層次矛盾都未搞得清楚，一時話純屬經濟矛盾，一時又話經濟、政治同民生都包涵在內，隨風擺柳，取巧投機。ＣＹ依家落足心機解構深層次矛盾，唔通想將煲呔曾比下去？不過，無論ＣＹ解構嘅深層次矛盾真唔真確，佢同煲呔曾都一樣，都係識提問題、唔識畀答案，諗唔出令人拍掌叫好嘅解決方案，ＣＹ係咪應該先解決咗自己呢個矛盾先呢？

預算案今月底公布，ＣＹ身為行會召集人，呢個時候公開點評預算案，唔知算唔算踩界，而「鬍鬚曾」曾俊華尋日被問起預算案係咪唔應該減利得稅時，就向ＣＹ反擊，話：「佢日日都講嘢㗎啦。」又強調自己一直關注貧富懸殊問題，至於會否減利得稅，大家就要等待預算案公布。