Judy自創禧辰快三十年，依家旗下嘅LeSportsac已經有六間舖頭，既做零售又做批發，記得有次前泰國總理他信太太來港，拉咗大隊人馬去專門店掃袋。咁多年來，Judy代理嘅貨品有幾百種，足夠開間小型百貨舖。

原來Judy好鍾意四圍貢搵新嘢，只要香港冇嘅嘢，佢就會諗辦法引入嚟。近年興起環保潮流，觸覺敏銳嘅Judy都引入唔少環保潮袋，好似得意熊仔環保袋，唔少人見到都愛不釋手。香港要保持創意活力嘅國際城市形象，確實要多啲Judy呢種人才。

戴眼鏡擋桃花

講起個人品味嘅執着，Judy絕對係代表人物，佢戴咗廿幾年嘅白色眼鏡，就係一個活生生例子。Judy話，廿幾年前聽人講戴眼鏡可擋桃花，佢將喺雜誌見到嘅兩副眼鏡糅合一齊，設計咗個款式後再搵師傅訂做，自此副粗框白色眼鏡就變咗佢個人標誌，咁多年嚟，副眼鏡鏡框基本不變，只係一時大啲、一時細啲，有時闊啲、有時窄啲，連幫佢度身訂造嘅師傅都退咗休，所以上次佢一次過做咗六副添！

卓妮