王家衛公子盼獲指點

Yundi尋日中午由北京抵港，一落機就即刻趕到尖沙咀文化中心同指揮見面開會兼綵排，跟住舉行記招，然後同近千個鋼琴師生開「鋼琴大師班」，接住仲要見傳媒，行情密麻麻，難得全日都無粒米落肚嘅Yundi，都仲可以展現一貫親切笑容話唔辛苦，事關今次返嚟香港，覺得大家對古典音樂嘅投入更多，感受到大家好想去了解古典音樂嘅熱情，所以開心到唔記得攰。

Yundi早已攞咗香港居民身份，但經常要周圍飛，差唔多有成年無返香港，尋日難得開「鋼琴大師班」，自然吸引唔少蕭邦迷嚟聽，為咗等學生可以近距離接受佢嘅點拔，大會特別安排咗兩個學生上台彈畀Yundi聽，等Yundi即場指導佢哋。機會咁難得，聞說大導王家衛位公子都想嚟畀Yundi指點吓，可惜因為實在太多人報名，最後都係結唔到師徒緣。

除咗小朋友之外，唔少大人都係Yundi嘅fans，好似贊助獨奏會嘅信興集團太子女蒙倩兒都有嚟，仲即場送咗部數碼相機畀Yundi留念，倩兒話屋企人對音樂同教育最支持，但就無講依家身體康復晒嘅爸爸蒙叔到時會唔會嚟支持。講番個記者會，除咗兩場音樂會嘅贊助人中銀香港營運總監李永逵同港樂代表之外，仲有一個特別嘉賓，就係Yundi個蠟像。

雖然個蠟像做起好耐，早已放喺上海杜莎夫人蠟像館，但Yundi話佢都係第一次見，睇到都好驚喜，只係Yundi覺得對眼好有外國人feel，唔係好似自己，但頭髮同手就似到十足十，不枉當日用兩個鐘「度身」做。為配合音樂會，主辦當局仲專程將蠟像運到香港，等李雲迪與「李雲迪」相聚在香江。

卓妮