支持環保當然係好事，之但係點解要徵稅嘅呢？即係咁，環境局局長邱騰華話喎，香港每年產生大約七萬公噸廢棄電器電子產品，數量一直以每年百分之二幅度增加，如果唔想塞爆堆填區，就要諗辦法處理電子垃圾。其中一個辦法係設置中央處理設施，交由專人負責回收。由於要耗資一大筆公帑，所以邱局長打算收回成本，徵稅嘅構思就應運而生嘞。講到尾，又係用者自付，亦可以話係污染者自付。

假如真係徵稅，點樣徵呢？徵稅途徑主要有兩個選擇，一係向生產商預先收費，再將費用轉嫁畀消費者；一係等到交易嘅時候由零售商直接向消費者收。換言之，羊毛出在羊身上，電器未來無可避免會加價。

至於稅額幾多，邱騰華就話嘞，最新嘅民意調查顯示，接近一半市民認為收費不多於零售價百分之二點五就合理，另有四分一市民認為合理範圍介乎零售價百分之二點五至百分之五。如果參考海外地區收費，小型電器大概收一百元，大型電器二百至二百五十。計劃列入徵稅範圍嘅五種電器，包括電視、雪櫃、冷氣機、洗衣機同埋電腦。

唔知大家點睇，功夫茶就聞到一陣燶燶地嘅怪味。你知啦，近排震動全城嘅反高鐵事件，死因之一係諮詢不足，結果搞到倒瀉籮蟹一鑊粥，今次諮詢徵收電器回收稅會唔會重蹈覆轍㗎？會唔會又有人跳出嚟大大聲反對㗎？

如果你問邊個會反對，功夫茶第一個諗到消費者。冇辦法，你一話電器加價，消費者十居其九唔高興。第二個有可能反對嘅係私營回收商。喂，根據政府構思，設置中央處理設施之後，將會透過招標委聘承辦商負責回收，即係隨時打爛好多人飯碗。事實上，環保回收業總商會主席羅耀荃已經批評，按照政府家陣嘅方案，容易造就承辦商壟斷市場，等同與民爭利。所以咯喎，羅耀荃揚言，如果當局堅持原有方案，不排除示威抗議。

再講吖，事有輕重緩急，目前最迫在眉睫嘅環保課題係地球暖化，邱騰華唔去動動腦筋減少廢氣排放，淨係推出徵收電器回收稅，算唔算避重就輕呢？講得誇張少少，面對海水上漲帶來陸沉威脅嘅馬爾代夫亦都有機會反對，佢哋會話，邱局長，咪掛住徵稅掠水先啦，大難臨頭嘅地球村島民等住你救㗎！

咦，咪住先，中央處理電子垃圾嘅設施會喺邊度興建？有冇必要再次徵收土地？會唔會打攪另一條菜園村？萬一諮詢不足之下又激起民憤，熱血青年又群情洶湧包圍立法會，邱騰華最好諗定逃亡路線圖，否則好似運輸及房屋局局長鄭汝樺慘遭圍困幾粒鐘就唔好啦！

總而言之，支持環保係好事，諮詢不足係壞事，黑箱作業一意孤行必定招致反對不絕！