立法會上星期畀反對興建高鐵人士衝擊，政府高層點都要回應幾句，於是發生咗局長「爭場」嘅場面。
話說環境局局長邱騰華原本定咗喺尋日上晝十一點四十五分喺政府總部，講廢置電器同電子產品嘅回收徵費計劃，不過運輸及房屋局局長鄭汝樺同保安局局長李少光喺朝早政府早禱會後決定對衝擊立法會事件發言，邱騰華惟有「讓路」，自己喺下晝再講。
其實政府同市民嘅溝通咁差，官員爭相出嚟透過傳媒向市民交代，真係絕無僅有，尋日撞到正有咁嘅歷史性時刻，完全係因為上星期六發生咗令社會咁震撼嘅事。煲呔曾尋日黃昏都要喺政府總部講咗一輪講咗等如冇講嘅嘢喇。話時話，傳媒尋日朝早喺教堂搵佢回應，煲呔曾都掂行掂過唔答，不過最少證明有一樣冇變嘅係，佢冇離棄主，唔知佢有冇求主賜佢智慧，去解決香港嘅問題，賜佢愛心，去為港人解除厄困？