公社兩黨總辭如箭在弦，建制派表面上話未決定係咪參與補選，但大家已密鑼緊鼓開始做嘢。揚言有意空降新界西嘅自由黨田北辰頻頻出動，尋日印咗十萬份精美宣傳單張，寄畀兩個選區嘅中產家庭，為補選造勢，一個係佢聲言去馬嘅新界西，另一個係佢「舊環頭」美孚，莫非田二少做咗兩手準備？
單張封面除咗有田二少嘅大頭靚仔相外，仲大大隻字印住「中產我撐你，無人理你有我」嘅字句，擺明目標係吸納中產選民。單張入面嘅「疑似政綱」亦以中產角度出發，例如爭取政府減稅，希望得到嗰班冇得攞社會福利又要交重稅嘅中產支持。
最值得留意嘅係，我哋搵勻晒成份單張，都見唔到自由黨黨徽，只係喺單張入面嘅相片偶爾見到豆豉咁細粒嘅黨徽出現，自由黨喺上屆立會選舉慘遭滑鐵盧，田二少咁做，莫非想無黨化。呢批宣傳單張以郵政通函方式寄畀選民，淨計郵費都唔小嘢，話佢冇心去選都冇人信嘞；若然計埋入選舉經費，條數都幾大！