本文重點
建制派議員「飯盒會」已經係第五次，頭三次喺上海總會，第四次喺全國政協常委兼民建聯監委會主席楊孫西清水灣大宅，尋日移師「IQ博士」黃宜弘地頭中環香港中華總商會會所，出名愛酒嘅IQ博士除咗請食飯，仲出動私伙靚酒「名將茅台」款客，可能想大家飲到high high哋，可以暢所欲言啦。
IQ博士做東請客
尋晚建制派「飯盒會」有二十二名議員出席，人數係五次中最少，但就多咗兩個稀客，分別係政制及內地事務局局長林瑞麟同副局長黃靜文。大家酒過三巡，風花雪月一輪之後，開始討論國家大事，討論得最激烈嘅，係建制派應唔應陪泛民一齊玩五區總辭補選，對補選之位雄心勃勃嘅民建聯同自由黨打開天窗說亮話，表態贊同參選，亦有人反對，覺得唔應該幫泛民造勢，不過始終佔少數。
大家各自表述立場，毋須有共識，而林D9竟然做起球證上嚟，發言話既然港澳辦同中聯辦都指五區總辭唔係「公投」，如果政黨有實力，大可參選無妨咁話，即係曲線鼓吹建制派參選搶位。林D9有咁嘅舉動，絕對唔奇，如果建制派幫手搶到泛民一、兩個議席，港府要通過政改方案機會又多幾分，林D9梗係要把握機會向建制派落嘴頭喇。
