當日Eva連埋畀人用膠樽掟中頭嘅黃宜弘、自由黨主席劉健儀、工聯會黃國健等十九個議員喺警方護送下入咗中環港鐵站，一行人搭一個站「逃亡」到金鐘。其中一個落難議員李慧琼（Starry）憶述，當時情況太混亂，而且大部分議員通常以私人座駕代步，所以好多人都冇散紙或者八達通喺身，港鐵惟有開閘放行，Starry笑言：「我哋都冇畀錢，搭咗霸王車。」由中環搭去金鐘嘅車資每程四元，十九個議員連局長同幾十個警察，呢次逃亡行動可能拖欠港鐵幾百元。

Eva身邊人透露，局長平時都係八達通不離身，由此推斷，Eva有可能冇搭霸王車，而警方發言人就話已經即日幫參與行動嘅警員繳付車資，換言之，依家得番班議員仲未「找數」。不過，自由黨副主席張宇人自言冇跟大隊喺金鐘落車，而係直接搭去九龍塘轉的士返屋企，佢出閘時仲好誠實咁補足車資，唔知其他議員會唔會都畀番錢港鐵呢個救命恩人呢？

大輝變裝立會正門離開

其實當日都有好多支持高鐵撥款嘅建制派議員離開時冇遇到阻撓，好似五散人嘅林大輝走嘅時候刻意「變裝」，戴cap帽兼換上便服，所以大搖大擺喺立法會正門走都冇畀人圍，嗰日仲趕得切喺晚上八點鐘到九龍仔公園球場踢波添。其餘四散人都喺正門成功離開，冇扮鬼扮馬，睇嚟佢哋慶幸走得甩嘅同時，都要反思吓點解自己嘅知名度低到連示威者都認唔出。