本文重點
近兩年轉型做旅遊飲食節目主持人嘅名模楊崢（Vanessa），儼然成為新一代美女食神。佢最鍾意食日本菜，最近去得比較密嘅係海港城Miso日本餐廳，對佢哋嘅燒鯖花魚印象最深刻。
Vanessa特別推介燒日本鯖花魚定食，佢一向好怕魚腥味，但係呢度嘅鯖花魚肉質鮮嫩，好啱佢嘅味蕾。條魚有一隻半手掌咁大，佢可以連肉連皮一個人拆骨食晒，仲要求侍應畀多啲醬汁佢點添！
甜品種類多
呢度嘅甜品同樣氹掂Vanessa嘅五臟廟。一般日本餐廳甜品來來去去都係雪糕或者糯米糍，但係Miso勝在甜品種類多，好似冷製沖繩風焗椰子布甸配紫芋雪糕同杏仁豆腐抹茶忌廉汁配黑芝麻雪糕，Vanessa讚話單係賣相已經好吸引。
Vanessa主持節目咁多年，對飲食要求愈嚟愈高，最近佢正籌備推出食譜，仲因此四圍飛搵好嘢食。對於佢至愛嘅日本菜，Vanessa話日日食都唔厭，亦都鍾意發掘新嘅食肆，下次卓妮再搵佢同大家報吓料先。
卓妮