本文重點
香港青年聯會副主席秦善文（Samuel）因為以天價買天滙一炮而紅，Samuel最近又有超豪搞作，就係斥資二千萬元喺中環開咗個私竇做「男人遊樂場」，佢趁住舖頭仲未開張，星期日約咗老友曾智雄(William)去試機。
卓妮都係音響發燒友，所以貢去趁熱鬧。一開道門，Samuel即刻好緊張大叫︰「快啲閂門！」仲以為佢哋搞乜添！原來兩個家有嬌妻嘅大男人喺度試機！
中環開舖代理Kharma音響
Samuel間舖主要代理荷蘭音響品牌Kharma，成間舖頭最貴係一對二百四十萬元嘅喇叭，最平一條線都七千幾元，名副其實係專業發燒友樂園。
Kharma係全球最頂級音響品牌，佢哋嘅捧場客非富則貴，擁有一套Kharma音響已經係身份象徵。聽聞有啲人買番嚟之後唔駁線，淨係擺喺度做裝飾，為嘅就係顯身價。
Samuel講起至愛就停唔到口，佢話Kharma鑽石高音出晒名，一隻喇叭重量可以高達一千磅，音色靚到好似就喺音樂會現場咁！
好多人都話音響係男人嘅玩具，領呔大王曾憲梓二公子William十幾年前都係音響發燒友，後來因為開始搞社會公益先分身不暇無再玩，所以Samuel開檔，特登搵William過嚟畀吓意見。
做蜂鳴器出身嘅Samuel，有見香港Audio巿場發展唔錯，所以決定將屋企套音響搬過嚟中環開舖，做生意之餘，又可以同班兄弟有間「私人影院」，得閒煲吓碟、聽吓音樂。間show room有四、五百呎，成間房用隔音棉，地板又有防反彈設計，單係裝修已經使咗唔少錢，加上間舖入咗唔少現貨，所以投資額要成二千萬咁多，不過Samuel買少層樓都喺度啦！
卓妮