由工聯會會長鄭耀棠牽頭成立嘅「政制向前走大聯盟」，首兩批發起人有一百四十四名，啱啱夠砌一副麻雀，但講到代表性就唔係好多元化，只見民建聯、工聯會、經濟動力同自由黨等核心建制派政團，唔見「五散人」、匯賢智庫葉劉淑儀、旅遊界謝偉俊、金融服務界詹培忠同勞聯李鳳英等獨立建制派議員。
「五散人」討論過應否加入，最後認為大聯盟親政府色彩太濃，好似入咗就要支持政府政改方案，唔符合佢哋崇尚自由、反對綑綁嘅作風，加上佢哋未正式諮詢業界，為免將來臨急轉軚，惟有齊齊請棠哥食檸檬。
向來獨行獨斷嘅葉太同Paul謝，亦雙雙婉拒棠哥邀請。前者重申對現方案有意見，好難瞓身支持；後者更質疑大聯盟係「門面工夫」，對推動政制向前走實效不大。金勞詹同英姐就話冇收過大聯盟邀請，前者表明即使獲邀都唔會入，後者就坦言現時政治形勢睇唔到方案有機會通過，政制想向前走多半步都幾難！