唔少人話娛樂圈係大染缸，浸大校董會主席王英偉就好開通，大公子王梓軒近年加入樂壇出唱片，食娛樂圈飯。王爸爸唔單止無阻止，仲鼓勵囝囝見吓世面。其實梓軒擁有美國康乃爾大學心理及現代舞雙學士學位，文武全才，一個唔覺意進身為樂壇天王，隨時帶挈老竇做星爸。
浸大電影學院尋日宣布成立，唔少電影大老闆及名導到賀，電影發展局主席蘇澤光率先代表發展局「科水」，將一張三百四十萬元支票交畀浸大校長吳清輝及王英偉，「成龍慈善基金」亦承諾五年內每年捐款十萬元撐浸大。王英偉拖住位型男四圍同世叔伯打招呼，睇真啲係囝囝梓軒。今年廿三歲嘅梓軒啱啱獲電台頒發「新人王」獎，「80後」嘅佢前途無可限量，近日獲電影公司睇中，將參與拍攝一部講述年輕人熱愛舞蹈嘅電影，升呢做埋明星。
唔少人慨嘆香港電影一池死水，蘇澤光唱反調，話大中華地區影視數碼媒體產業近年急速發展，中港合資嘅電影大收旺場，電影業人人有工開，部分職位仲請唔到人，仲要加快培訓新人喎。