《水滸傳》有一百零八條好漢被逼上梁山，工商界政改動力發起人咁啱又係一百零八人，係咪寓意被民主派嘅五區總辭策略逼到要走出嚟攪局抗衡，咁就不得而知，不過可以肯定嘅係，名單以工業總會、廠商會及多位富豪二代為骨幹，如果話工聯會會長鄭耀棠嗰檔「政制向前走大聯盟」係人大、政協變身版，代表親中陣營，咁呢檔工商界政改動力，就係由廠家及富豪二代撐起半邊天，用發起人林健鋒嘅話講，呢個組成由四十後至八十後嘅人都有。

睇番份名單，不乏城中富豪嘅代表，好似合和實業主席胡應湘、印度富商夏利萊家族嘅夏雅朗、華置劉鳴煒、何鴻燊家族中人、嘉華集團太子爺，亦有前恒生大班柯清輝同蘭桂坊之父盛智文。最離奇係，捲入維港巨星匯爛騷風波嘅前美國商會主席詹康信都係發起人，究竟係外國勢力干預香港政改，定係經濟動力威到可以策反美國商會呢？

退黨黨員獲邀 攞景兼贈興

林健鋒話，工商界政改動力今月底會搞研討會同設網站收集意見，往後有乜具體行動，一切仍待商討；佢強調另組聯盟非同棠哥打對台，只係想畀工商界多一個發聲平台。林健鋒呢句話真係有啲值得商榷，事關一直被視為工商界立法會代言人嘅自由黨高層，就無得享用呢個平台嘞。

據悉，自由黨一眾代表人物好似田北俊、田北辰、劉健儀、方剛同張宇人，全部無收過經濟動力邀請，名單上僅有嘅三名自由黨黨員蘇開鵬、孫啟烈同何栢霆，只屬黨內二線人物，反而一班自由黨退黨黨員好似羅煌楓同李漢城，就有一大堆，真係攞景兼贈興，呢份名單嘅潛台詞，莫非想暗示自由黨不再代表工商界？

林健鋒就解畫話，籌組聯盟以工商界朋友為目標，歡迎任何人加入，無其他目的。不過，經濟動力有意取代自由黨、成為工商界新代言人，人所共知，3L毫不避忌，「工商界政改動力」擺明唔預自由黨玩，林健鋒嘅說話有幾大可信性，大家心中有數啦！