經營女裝衫嘅慕詩（Moiselle）主席陳欽杰（Boby）時刻緊貼時裝潮流，衣着品味自有獨特之處。卓妮尋日喺時裝預演騷見到佢，Boby話佢公司無出男裝，無得親自演繹自家牌子，當然佢都係名牌擁躉，最着迷Dolce & Gabbana同Prada，不過至緊要揀選一隻心愛嘅Patek Philippe腕錶襯托，唔同衣着襯唔同款式嘅腕錶，咁就天衣無縫啦！
Boby尋日着住Prada大褸襯條Dior牛仔褲，有型又有款。佢話公司一路唔做男裝，因為男士唔係幾鍾意購物，唔似女仔喜歡扮靚。但Boby對Patek Philippe就一見鍾情，幾年前喺一位醫生朋友介紹下，開始沉迷收藏Patek Philippe，依家有六、七隻。佢鍾意呢個牌子嘅手工夠精細，又具增值潛力，好似尋日佢戴住嗰隻經典白金Patek Philippe，幾年前買廿幾萬，依家升值成倍至四十幾萬。
太太知道佢鍾意，會買嚟做生日禮物送畀佢。Boby用短短十二年時間，就喺競爭激烈嘅中港台高檔女裝市場闖出一片天地，都抵佢獎勵吓自己嘅。