自由黨前副主席周梁淑怡（莎姐）自從○八立法會選舉失利後，近年漸漸淡出政壇，仲成功轉型做清談節目主持人。電視圈嘅人成日話上鏡肥過真人，莎姐為咗以最佳體態出鏡，最近每星期會去北角跳舞兩次keep fit，跳完舞後，仲經常同朋友到附近炮台山蜆殼街嘅Oyster Cube蠔吧餐廳high tea食蠔。
莎姐迷上Oyster Cube係貪嗰度有齊各國嘅新鮮生蠔，美國、法國、澳洲同加拿大嘅靚蠔應有盡有。莎姐話食蠔唔一定要大隻，最緊要夠新鮮，佢一般會叫六隻唔同「國籍」嘅生蠔，食嘅時候再加小小檸檬汁吊味，佢話咁先可以食得出蠔嘅鮮味。除咗蠔之外，莎姐尋日就叫埋Oyster Cube嘅招牌甜蝦同燒羊架。
Oyster Cube嘅老闆Ivan話，莎姐通常會叫美國生蠔Skookum、法國嘅Fine de claire同French special，前者大隻多汁，後者則爽口，每隻售價卅四至四十元，都算抵食！