本文重點
啱啱喺前日宣布卸任嘅前中國外交部副部長何亞非，最新動向雖然未正式公布，但尋日在港現身，坐住外交部駐港特派員呂新華嘅座駕，齊到中環香港會午膳，仲有大批外交官陪同，咁啱畀卓妮撞到正，參加午宴撐何亞非嘅並非普通人，而係城中顯赫嘅大地產商同銀行界大孖沙，認真唔講得笑！
何亞非上月代表國家出席丹麥哥本哈根氣候會議，當時美國代表表明不會資助中國減排溫室氣體，但何亞非就狠批美方代表說：「我認為他有關資助中國的言論，不是缺乏常識，就是極不負責！」事後掀起一輪外交角力。
來港分享氣候會議成果
卓妮八到，何亞非參加氣候會議後，獲利豐集團主席馮國經擔任副主席嘅中美交流基金會邀請，來港與社會各界人士聚餐，分享出席氣候會議嘅成果，雖然何亞非喺聚餐前一日卸任咗外交部副部長，但仍然如期來港，認真有心，更獲得一班大孖沙撐場，就更加難能可貴。
卓妮喺現場分別見到新鴻基地產副主席郭炳江、新世界發展董事總經理鄭家純、信和置業主席黃志祥、恒隆集團主席陳啟宗、合和實業主席胡應湘、自嘲「神經富豪」嘅旭日集團董事長楊釗、渣打香港行政總裁洪丕正、滙豐執行董事王冬勝、太古（中國）主席陳南祿及前立法會議員丁午壽等。
講番○八年成立嘅中美交流基金會，係一個致力改善中美關係嘅非政府及非牟利團體，成立目標在於改善中美兩國人民溝通，加強兩國喺經濟、金融、教育及文化之間嘅關係，今次中美兩國喺氣候變化問題上傾到㷫合合，基金會就真係搵啱題目嘞！
卓妮