尋日開始，中電加電費，四條小輪航線加船費，房委會屬下停車場加月租，山頂纜車亦加埋一份，大老山隧道又話申請劃一加價，連搭飛機都要畀多啲燃油附加費。一聽個「加」字，當堂打晒冷震。呢度加啲，嗰度加啲，打工仔份糧就原地踏步，甚至可能打倒褪添，問你點頂！

好似電費、交通費咁，無論貧富，係人都要畀。有錢人就話冇所謂啫，嗰啲餐搵餐食餐餐清嘅貧困家庭，每個月使多一百幾十，只能夠喺其他基本生活開支度慳番嚟。再加落去，貧富懸殊只會愈來愈犀利，「朱門酒肉臭，路有凍死骨」遲早周街都係。

呢嗱，社區組織協會啱啱公布貧困兒童十大關注事項，排第一嘅正正係貧富懸殊，跟住係失業率上升、學生資助不足，以及政府未制訂貧窮線同滅貧指標等。佢哋話，當局喺教育、社會福利同醫療方面政策未能配合。有兒童權益組織嘅最新監察報告顯示，曾蔭權喺保障兒童方面，評分首次跌到零，再創新低。幾十個小朋友尋日企出嚟表達不滿，話要「請曾蔭權食零雞蛋」。

呢，有位十一歲小朋友，爸爸患癌症，媽媽有心臟病，要同十五歲嘅家姐孭起頭家，每個禮拜有一半時間要出街執紙皮幫補家計，有時仲要同啲婆婆搶紙皮。唔夠錢，惟有一日三餐變兩餐，而且只能夠買啲平價嘅過期食品。

食唔飽、食唔好不特止，連學業都受影響。呢位小朋友話，政府資助唔夠，喺學校學少好多嘢。講到新年願望，佢唔會對政府有太大期望，只希望有餘錢參加多啲課外活動。

因為窮，課餘要搵錢幫屋企，冇時間溫書；因為窮，冇得參加課外活動。貧困兒童根本冇可能同其他同學喺同一條起跑線出發，只會畀人愈拋愈遠，成為隔代貧窮嘅犧牲品。試問仲要等幾耐，呢個冷血政府至肯幫佢哋？

回歸已進入第十三年，但貧窮問題愈來愈嚴重。聯合國研究報告話，香港係亞洲貧富懸殊最嚴重嘅城市，堅尼指數遠超警戒線，貧窮人口超過一百二十萬。亦有數據顯示，全港有約一百萬打工仔嘅實質工資過去十年不升反跌。

窮人愈來愈多，生活指數愈來愈高。當局淨係識幫自己友開新官位、加人工，對貧困家庭就一毛不拔。嗱，失業率長期高企，為失業人士提供嘅支援嚴重不足，甚至連再就業支援同交通費支援計劃都停埋。連去見工嘅車錢都冇，叫人點搵工吖？港府根本冇心扶貧，唔該咪再扮晒嘢，嗌乜鬼「保就業」啦！

貧窮噩夢未去，通貨膨脹又嚟，家陣連小朋友都要為屋企有冇飯開、大人有冇工開擔憂，唔知煲呔曾仲會唔會「瞓得好好」呢？