抖咗個快樂聖誕及新年假期嘅立法會，下周三就會召開新一年嘅第一次大會，今年第一個動議辯論係由李慧琼（Starry）提出，佢食住早排消委會公布無良短訊個勢，提咗多項改良措施，當中包括建議立法成立一個具執法權嘅機構，專責保障消費者權益。
為堵塞現時法例零散、互不協調嘅情況，Starry提議設立一條《消費者權益保障條例》以規管不良營商手法，並因應新例成立專責執法機構。截至尋日為止，已經有三、四個議員入咗條修訂案，但都一致支持Starry呢個執法機構嘅建議，換言之，呢個動議辯論幾乎十拿九穩可以通過。
按照動議嘅構思，保障消費者法例擬訂後，政府可以授權消委會嚟執法，亦可以另外成立一個「消費者保障專員」嚟執法，依家消委會只係一個調查、研究機構，執法嘅嘢係由政府部門嚟做，授權消委會執法可能性好細，但成立另一個執法機構，咁消委會又面臨被矮化甚至被吞併嘅威脅，消委會真係有排煩囉。