本文重點
葉劉前晚同囡囡葉榮欣一齊出席「香港醫學會八十九周年除夕晚會」，今次活動以Global Extravaganza為題，所以大會嘅Dress code係環球服裝，仲即場選出打扮突出嘅女士上台競逐Global Girl，以一身黑色背心及膝連身裙襯歐洲復古襟針嘅葉劉有份入圍，同幾位以中國、蒙古、印度同韓服打扮嘅女士即場行Catwalk競逐殊榮。
奪魅力非凡大獎
每位女士都行得風姿綽約，輪到做過保安局局長嘅葉劉嗰陣，佢就棄用一般模特兒慣用嘅婀娜步法，改為用紀律部隊步操方式嚟演繹自己身上嘅服裝，雖然陽剛味濃，但亦充分表現出模特兒自信一面，最後仲贏咗個魅力非凡大獎添！
至於臨倒數前半個鐘先至到場嘅醫學界議員梁家騮前晚就連趕三場，不過唔講唔知，原來梁議員係個無錶人，佢話因為做手術成日都要洗手，戴手錶會好唔方便，所以佢都已經好多年無戴手錶，但亦因為咁訓練到自己有時間觀念。
講開新年願望，佢話希望可以將○九年未做晒嘅嘢做埋佢，一切順順利利喎。