帶假諾獎影相

高錕除咗招牌笑容外，仲帶埋複製嘅諾貝爾獎章去，等自己有嘢揸手同賓客影相，至於真品當然已送咗畀香港中文大學啦。

台灣行政院國家科學會委員會駐三藩市科技組同硅谷十個華人高科技及生化組織，喺三藩市南灣聖他卡拉市設宴，為高錕搞咗個慶祝會，筵開十二席，會上仲播放幻燈片介紹高錕成就。

一向平易近人嘅高錕一入場就以佢嘅招牌笑容同來賓逐一握手，佢囝囝就代父發言分享去瑞典領獎嘅喜悅，而一向唔多嘢講嘅高太本來無打算回答記者提問，但被問到港府以高錕名字重新命名香港科學園會議中心及廣場時，高太忽然打趣反問：「點解新聞界問題咁有趣，總係問理所當然嘅嘢，好似太陽出來你開心嗎？」睇嚟高太唔係唔想同大家分享，只係一講就要言之有物咁話。