泛民爭取二○一二年雙普選議題，一直畀搞事四人幫利用嚟攪局，甚至妄想營造自己係共主角色操控泛民，當中被批「忽然民主」嘅民主阿婆更加無所不用其極，成日想騎劫泛民活動，最廣為人知就係參加之前嘅七一或元旦遊行，每次到場都熠熠揚揚，扮共主搶盡風頭。不過，泛民尋日元旦發起遊行首次去中聯辦請願，由隊頭到隊尾再上番隊頭，都搵唔到民主阿婆嘅蹤影。

莫非民主阿婆中途又去咗恤髮？非也，其實係玩失蹤至真。梗係啦，時移勢易，民主阿婆嘅政治能量所剩無幾，淪為街邊阿婆，遠嘅唔講，就講去年七一遊行，民主阿婆去到維園現場先發現原來係無人騷佢，只得個前立法會議員單仲偕應酬咗佢一陣，民主阿婆想插隊加入遊行隊伍又失敗，結果要乾蒸兩粒鐘後面燶燶跟隊尾出發，認真無癮，試過嗰次，唔知係咪終於明白獻醜不如藏拙，所以今次唔再出嚟獻世！

甘威台上遭喝罵

其實民主阿婆已經係近兩個月嚟第二次玩失蹤，對上一次發生喺上月十八日，民主阿婆原本到立法會與議員飯局，當時正值泛民為五區總辭爭拗不斷，懷疑佢又密謀攪局，點知畀我哋提前踢爆，最後玩失蹤收場。英國人最叻玩政治，可惜恨鐵不成鋼，一班由港英政府培育嘅餘孽只學得半桶水，攪嘅局同陰謀詭計話咁易敗露，甚至不攻自破。

就好似甘乃威咁，○七年港島區補選期間就畀搞事四人幫等人逼退，讓路畀民主阿婆出選，到○八年換屆選舉時，四人幫又重施故技，甘乃威再無做蠢仔中招，結果成功走進立法會。令人可惜嘅係，甘乃威上任僅僅一年即爆出涉嫌求愛不遂怒炒女助理醜聞，尋日遊行前上台做騷時，仲畀一名年輕男子大聲怒罵，鬧佢令民主黨同泛民蒙羞，仲要搞到泛民補選失利喎，呢啲真係叫做自作孽，唔怪得人囉！