郭少明袋過百萬橫財

沙田馬場尋日舉行元旦賽馬日，為新年揭開序幕。林大輝拖埋太太，同葵青區議會主席周厚澄及沙田區議會主席韋國洪齊做啦啦隊，為愛駒「極奇妙」打氣。大輝曾自嘲無拉頭馬運，兩年來七度贏頭馬都無份影相，唔係撞啱開會就係去咗踢波，尋日終於打破宿命，捧走逾六十五萬頭馬獎金，大輝同輝嫂影相時笑到變「腰果眼」，話新年開齋夠好意頭。

獲財星高照唔止大輝一個，郭少明旺氣更勁，佢喺第十一場連派兩匹馬上陣，結果由「美麗傳奇」奪冠，除穩袋七十九萬幾蚊獎金外，馬會再醒多五十萬作為「自購馬首度勝出特別獎」，合共袋近百三萬。卓妮見佢夫婦兩人領獎時齊孭LV袋，一個男裝款，一個女裝款，襯到絕。有咗呢筆橫財，郭氏夫婦買多十個八個LV袋都無問題嘞。

講到新年願望，郭少明話希望遠離疫症，事關佢嘅化妝品零售生意最怕就係市面淡靜「拍烏蠅」，再嚟多次豬流感，就大吉利是囉。