功夫茶發緊乜嘢噏風呢？乜嘢受害者呀？乜嘢差錯腳呀？哦，係咁嘅，有一對英國夫婦重遊舊地，佢哋以前喺香港住過好多年㗎喇，九四年先至返祖家。好不幸，雖然係識途老馬，照樣係行差踏錯，七十五歲嘅英國大嬸Downey搭港鐵喺金鐘站步出車廂嘅時候，一腳踩落月台同列車之間嘅空隙，成個人就咁卡住。大批消防員要出動氣墊夾硬逼開列車，用咗二十分鐘先至可以救出受害者。

根據港鐵數據顯示，類似意外發生嘅頻率係每個月平均十宗。嗱，自從Downey大嬸闊別香江十五年以來，其實有一千八百個同是天涯淪落人，你話嘞，佢係咪可以成立一個同病相憐組織，大家得閒聯絡一下感情吖？

之不過咁，如果真係有一個差錯腳俱樂部，英國大嬸頂多只有資格做副會長，因為佢嘅傷勢未算最嚴重，會長之選另有他人。功夫茶強烈推薦一位七十九歲本地婆婆，兩個禮拜前佢喺港鐵旺角東站上車，一不留神右腳踩入空隙，然後失平衡仆低，噼啪！斷腳！

假設「獨腳婆婆」願意效法「獨臂神尼」率領群眾揭竿起義，相信港鐵唔敢繼續掉以輕心。如果大家唔知獨臂神尼係邊個，咁就等功夫茶簡單講解一下。民間傳說係話，獨臂神尼即係《帝女花》女主角長平公主，明朝慘遭清兵入關消滅之後，落難嘅長平公主隱姓埋名秘密練得一身好武功，收咗呂四娘等人為徒，然後咯喎，反清復明！

呢嗱嗱嗱，成立差錯腳俱樂部真係諗得過㗎，獨腳婆婆真係可以做會長㗎，幫大量受害者出頭討公道吖嘛，即係另類反清復明。你知啦，港鐵一向漠視乘客安全，叫佢安裝月台幕門防止墮軌或者自殺咩，佢睬你都傻；叫佢安裝自動伸縮月台踏板咩，佢睬你都戇；叫佢唔好咁多飛站、夾人、冒煙、壞車、延誤事故咩，佢簡直當你發噏風。所以咯喎，最好有一個壓力團體，不斷圍剿港鐵，務求改善服務質素。

講開又講，港鐵陷阱確係多籮籮，對於女士更加係膽戰心驚。全港公共交通工具之中，港鐵係最猖狂嘅色狼天堂，調查發現有超過三成女乘客曾經受到非禮或者偷拍。冇耐前之嘛，連身為公務員嘅食環署衞生督察都獸性大發，居然喺港鐵非禮十六歲女學生，罪名成立，收監法辦。

點都好啦，唔該港鐵反省檢討，切切實實消除意外陷阱，如果真係有千幾個差錯腳俱樂部會員集體圍剿，你都咪話唔頭痕！