繼前日出席完酒店嘅丹麥食品展後，靚靚丹麥王妃卡雅利耶（Princess Marie Cavallier）尋日繼續隨丹麥祖謙王子（Prince Joachim）做親善大使，去尖沙咀海港城為丹麥設計珠寶展做揭幕嘉賓。
今次有份展出嘅丹麥商品差唔多有廿個品牌，首飾之外，仲有傢俬、玻璃、羽絨、皮草、皮鞋、藝術印品等，除咗乾貨之外，連礦泉水嘅Counter都有，真係有幾分工展會Feel，難得王子同王妃唔嫌悶，行勻晒成個場，明明睇嘅都係自家品牌，但都交足功課好似好有新鮮感，畀足機會圍喺場外影相嘅傳媒捕捉Shopping神態。
嫁得去丹麥，當然要用番夫家嘢啦，難怪王妃打扮簡單，都不忘話身上都有戴丹麥珠寶。佢聽見王子話喺香港遊船河、行山同行吓小街舖仔好過癮，就話希望有時間可以跟住王子行吓啲得意地方，真係畀足面老公！睇嚟祖謙王子雖然同前港產王妃文雅麗離婚，但生活一樣咁甜蜜。