本文重點
卓能（集團）主席趙世曾女兒趙式芝讀建築系出身，但一直無靠父蔭，自立門戶闖天下，既開公關公司，又開模特兒公司，靠自己打拚建立強大人際網絡，依家仲喺日本攞咗手袋做代理，勢要再創一番事業。
卓妮日前行經銅鑼灣鬧市，見到趙式芝（Gigi）行色匆匆，步入SOGO百貨公司，即時上前同佢打招呼，問佢做乜咁趕，佢好nice話：「我啱啱做咗日本手袋品牌A.D.M.J嘅代理，嚟緊會喺呢度賣，依家去將啲貨上架。」仲邀請卓妮一齊去幫眼睇吓啲手袋靚唔靚。Gigi喺場內忙個不停，不時將啲手袋擺放喺唔同位置，有啲擺完唔滿意，又再擺過，務求做到最好。
對於呢個手袋品牌，Gigi信心十足話：「我第一次做品牌代理，好緊張，但之前已將個手袋畀過啲朋友睇，個個都好鍾意，令我信心十足。」其實富豪二代出外打拚，一啲都唔容易，趙式芝算係難得嘅一個，佢話：「我八年前讀完建築系返香港，開咗公關公司，嗰時乜都唔識，只係想鍛煉自己，學吓同人溝通、學做巿場推廣，咁多年來識咗好多朋友，算係一個好開始。跟住○七年又同大陸一間模特兒公司合作，開模特兒公司，但呢啲感覺都唔係好實質，想做啲實質啲嘢，今次機緣巧合經朋友介紹，識咗呢個手袋嘅老闆，一開始已好鍾意佢哋嘅產品，傾過無數次之下，終於可以成功攞到個代理。」
爹哋親授生意經
趙式芝一直沒有幫爹哋做生意，鍾意自己做；今次做手袋代理，原來都同爹哋摸過底：「我開公關公司嗰陣，爹哋媽咪都反對，覺得公關嘅嘢好唔實際；今次做手袋代理，爹哋好贊成，話遇到問題可以隨時問佢。」
趙式芝話，爹哋媽咪都唔係專制嘅人，好多時任由發揮，之後再同佢哋分享成果及過程，但佢話爹哋份人比較實在，佢會用好理性、好直接嘅方法去教佢，應該點樣做先好，好生意人嘅角度。有爹哋睇住，信心都大啲啦！
卓妮