卓妮尋日中午由中環搭港鐵到銅鑼灣，途經渣甸坊出口時，竟然遇到着淺藍色短袖衫嘅劉鳴煒，喺寒冷天氣下幫協康會賣旗，仲非常落力！

動員公司200人

卓妮上前同鳴煒打個招呼，影低咁難得嘅賣旗場面，但鳴煒好怕醜叫卓妮唔好影佢。問鳴煒係咪首次賣旗？他直話直說：「係呀，第一次賣旗！」說畢又埋首向市民賣旗，十足推銷樓盤咁落力，加上着短袖衫無懼寒冷天氣，打動唔少女士主動上前幫佢買旗，但佢咁平民化，好多都唔知佢係身家億億聲嘅富豪二代。卓妮見佢手上張貼紙旗都賣咗大半，仲一直賣到十二時售旗時間完結後先至同保鏢離開。

協康會主要為有不同能力問題嘅兒童提供適切服務，包括訓練自閉症、讀寫障礙等，但為何鳴煒會幫協康會賣旗呢？協康會話，鳴煒今年先至加入該會做義工，之前參加過兩項活動，第一次到中心探訪兒童，第二次出席兒童畢業典禮，當佢知道尋日舉行賣旗籌款，就熱心動員公司二百人幫手賣旗，由早上七時四十五分開始，一直賣到中午為止。

年僅廿九歲嘅鳴煒先後喺英國取得法律學士及法律哲學博士學位、倫敦經濟及政治學學院法律碩士學位，又喺美國紐約考獲律師牌，並擁有特許財務分析師資格。鳴煒仲身兼好多公職，既參加香港青聯工作，又係百仁基金同菁英會成員添！

卓妮