樂施會尋日舉行一年一度嘅樂施毅行者遠足步行籌款，活動起點北潭涌晨早已人頭湧湧，唔少城中名人都報名參加咗名人賽，包括出名鍾意行山嘅「換肝之父」范上達醫生，仲有首次參加嘅「魔童」王維基。年逾六旬嘅范醫生已經係第七次參加毅行者，去年佢組隊行足一百公里，仲以廿七小時創下自己最佳紀錄。范醫生平時每隔兩個星期行一次山，通常行西區多；佢講笑話，堅持行到咁多年，都係因為冬天要減肥喎。
尋日范醫生同三個後生仔組隊參加，見佢帶備行山杖、水樽等，全副武裝準備出發，但今年天氣特別凍，問佢有冇着多件衫，佢話：「有呀，着咗兩件咁多！」仲係Ｔ恤嗰隻，唔到你唔服！
不過講到搞噱頭，首次參賽嘅城市電訊主席王維基最拿手。佢着住自己設計嘅制服同隊員齊亮相，而幫佢哋四人拎食物嘅支援隊伍就有廿人，認真巴閉。魔童話，佢為咗參賽練咗三、四個月，朝早食咗一大碗飯打底，但仲係「唔知行唔行到」喎。