立法會會計界議員陳茂波（Paul）早前透露，為咗令一班幫佢多年嘅同事有更大發展空間，於是將自己嗰間「華德匡成」同一間「陳葉馮」會計師樓合併為國富浩華會計師事務所，等同事接多啲生意。國富浩華前晚舉行成立酒會，阿Paul好有面子，獲多名高官及議員畀面撐場，百多名嘉賓濟濟一堂。
現場所見，除咗議員仲有多名官員出席，包括運輸及房屋局局長鄭汝樺、政制及內地事務局局長林瑞麟、公務員事務局局長俞宗怡、財經事務及庫務局副局長梁鳳儀、審計署署長鄧國斌等，咁多高官一齊出席商業活動，畀足面阿Paul。
擔任新公司主席嘅阿Paul話，近年香港會計師專業及審計市場出現好大變化，中港兩地業務將更趨一體化，會計師樓一定要進行整合，提升力量和水平，仲開聲叫大家繼續支持佢哋會計團隊喎！