正如「金勞詹」詹培忠所講，建制派三十六個議員（不計立法會主席）有意組成協助執政大聯盟，以後定期「開飯」就大議題統一發聲，好似上一次就達成共識譴責議會掟蕉文化，當係正式開張舉行切燒豬儀式。

建制派本來約好今月廿七日（下周五）搞第三次飯局，當時盛傳港府有意喺廿五日推出政改諮詢，點知政府失驚無神變陣，提早喺本周三出招，即刻玩起飯局搞手民建聯，要拿拿臨Call人改期，飯局嘅目的，就不言而喻嘞。

批區會方案唔湯唔水

不過，議員個個都係大忙人，檔期唔係衫袖口，唔係話改就可以改，於是尋晚七點喺中環上海總會餐飯，一地紙飛機，工聯會無人到，「發叔」劉皇發七點九到，八點離開趕下場，匯賢智庫葉劉淑儀去完全國政協委員廖正亮嘅喪禮，七點半至趕到，自由黨方剛約咗業界，八點後至到，叫做有個代表。左湊右拼，最後只有約二十人出席。據悉，飯局上唔少人批評區議會方案唔湯唔水，為區議員製造特權階級；亦有討論五區總辭，不過無共識。

問番無現身嘅建制派議員，人人提起都好無奈。自由黨主席劉健儀話，一早答應咗業界出席晚宴，本來兩個副主席張宇人同方剛下周五會現身，但臨時改期，撞正張宇人要出席男拔萃書院籌款晚會，唔去唔得。建制派飯盒會氣勢不繼，講到尾，都係煲呔曾累街坊！