集時尚、品味、藝術、夢想生活於一身嘅超凡特刊——LUXE life（極尚生活）尋日正式誕生，《東方日報》隨報附送，內容精彩絕倫，由豪宅、跑車、遊艇、珠寶、葡萄酒佳餚等每個生活細節上，帶領大家領略非一般極尚生活。「LUXE life」尋日首日派發已好評如潮，上班貴族爭相索閱，更不乏名人捧場客，其中一個就係開始享受退休生活嘅金管局前總裁任志剛。
任總肥仔明捧場
為了推廣「LUXE life」嘅極尚生活品味，《東方日報》尋日派出多名靚仔靚女Model，打扮成英國紳士及淑女，早上八時開始分別喺中環、銅鑼灣及尖沙咀三個上班貴族及遊客嘅集中地派發「LUXE life」特刊；由於特刊嘅印刷精美，吸引不少途人索閱，甚至急不及待駐足翻閱。卓妮就喺中環娛樂行遇到任志剛，雖然佢正急步趕往赴約，都抵受唔住特刊嘅吸引力，接過特刊細閱，認真捧場！
任總走後，卓妮轉頭又見到立法會議員李華明，佢打開特刊翻閱內容，見到頭版介紹嘅豪宅，笑謂自己買唔起，但一揭到內頁介紹嘅「星級酒王」Chateau Petrus Imperial，肥仔明當堂生猛晒，話紅酒啱佢多啲，佢記得年前有次議員聚餐，鄉議局主席劉皇發就帶過呢支酒王宴客；仲有次去田北俊屋企，都飲過支一點五公升嘅Magnum靚酒。肥仔明仲好識貨話：「我都係鍾意八二年Lafite（Chateau Lafite Rothschild）多啲！」
名牌廣告夠吸引
名人咁識貨，上班貴族又點睇呢份特刊呢？從事專業會計嘅明小姐大讚特刊新穎有新意，話各專頁名牌可以吸引高級消費者注意。任職市場推廣嘅林先生亦都話，特刊廣告極具創意，版面主題設計清楚，印刷色彩鮮艷奪目；售貨員程小姐亦讚特刊內容豐富，肯定令消費者得益。韓籍遊客韓先生就話，素仰香港嘅資訊快而準，名牌專輯廣告對旅客好有參考價值，果然係人人看LUXE life！
卓妮