「熱狗」唔一定要配大香腸、番茄、洋葱等大大隻至好味，好似屹立中環幾十年嘅永樂園餐廳熱狗王，就吸引到一向嘴饞嘅醫管局主席胡定旭去排隊購買。卓妮八到，呢隻熱狗王肥胡由細食到大，以前後生上位搏殺時期，忙到無飯開，都會排隊買兩隻頂肚。
旅遊發展局主席田北俊早前推介旅發局出版嘅《「叮叮」香港電車地圖》，都有介紹呢隻咁受歡迎嘅熱狗王，店舖使用「摩天輪」老式麵包烤箱，將小號熱狗包烤得香軟溫熱，再配上荷蘭軟滑香腸，醬汁就以牛油、芥末、蛋黃、醃青瓜及糖、鹽、醋，配搭出完美嘅港式熱狗王，單腸八元，雙腸十元，每日外賣超過一千五百隻，絕對唔講得笑！
