據了解，唐唐約見建制派，目的係要樹立威信，顯示政改大龍鳳由自己領軍，為免太張揚，地點唔喺政府總部，而係山頂政務官官邸，而且只約政黨最核心人物，第一檔見工聯會，只約咗會長鄭耀棠同黨團召集人黃國健等少數核心，第二檔見民建聯亦只有劉江華等幾位高層。不過佢計漏一個梁美芬，都算大意兼無政治智慧。

「原來唔講得㗎！」

上周三，專業會議四人見完唐唐，大剌剌行番立法會，梁美芬一見記者就衝口一句：「我哋見咗唐英年之嘛。」記者們估到傾政改，窮追猛打，梁美芬知道漏咗口風，話唔知講唔講得，等佢問過特首辦主任譚志源；跟住佢行入立法會前廳，然後又返出嚟，話唔可以講，點知被記者問得兩句，唔講又講，乜都講晒。據直擊者講，石禮謙同黨友見梁美芬對住記者口若懸河，知道唔掂，於是遠遠嗌過去，叫梁美芬「聽電話」，兩人拉埋一邊密斟一輪後，梁美芬返轉頭同記者講：原來唔講得㗎！

不過，梁美芬禍從口出，引發記者瘋狂追料，民記、工聯同自由黨核心被問到埋身，逼住招供，但泛民就話無收過邀請，唐唐玩親疏有別遊戲一下子被踢爆。不過，都係自己攞嚟，要怨就怨自己政治智慧低啦。

建制派人多口雜

其實稍有政治識見同智慧嘅人，都知道敏感消息唔收得埋，尤其建制派咁多人，今屆仲多咗唔少未經歷練嘅政治新丁，喺政改前夕嘅敏感時刻「秘密相會」，邊有可能瞞天過海㗎？同埋唐唐以為做議員嘅人人都守口如瓶，亦反映佢對政治生態一竅不通，今次真係政治大露底囉！

聽講唐唐同譚志源知道梁美芬爆大鑊後，相當火滾，但面對親疏有別指控，不得不急急補鑊，拿拿臨打電話約泛民，第一檔係民協馮檢基同醫護界李國麟，尋日見其他政黨，因為寒流襲港，改喺政府總部見面，有泛民講笑話，阿基同李國麟可以上唐唐官邸，成為唐唐名單中泛民嘅唯一上賓，但無形中令二人被擺上枱，唐唐如果想佢哋兩票轉軚支持政改諮詢，咁就自己搵自己笨嘞！

講開政改，政府提早公布諮詢文件，令建制派嘅每月武林大會亦由今月廿七日改為二十日，提前一周進行。