上星期三立法會好難得咁通過咗復建居屋嘅動議議案，其中一個原因係有唔少「曾朋友」無投票，當中包括經濟動力嘅林健鋒（Jeffrey）。睇番立法會秘書處嘅紀錄，先知Jeffrey喺今個月三至八日都請咗假，所以連煲呔曾上星期嘅午宴同政改諮詢大龍鳳都無去。原來Jeffrey請假嘅原因都幾特別，係去咗韓國學整泡菜。
Jeffrey同我哋講，放假係跟幾個商界朋友去韓國參觀唔同企業嘅科研同企管部門，期間有個鍾意食韓國菜嘅朋友提議，話去到南韓不如學吓整韓國菜，Jeffrey聽落覺得唔錯就一齊去學埋一份。佢哋幾個大男人，一日就學咗整韓式牛肉同醃泡菜，Jeffrey話韓國菜不外乎將啲嘢「撈嚟撈去」，所以都唔難掌握喎！
Jeffrey仲自爆以前喺美國讀書時，一日三餐都係自己搞掂，就算依家屋企有工人，如果工人放假的話佢都會親自下廚，唔似其他人一定出街食喎！咁唔知Jeffrey有咩拿手好餸呢？唔知係咪驚我哋去黐餐，Jeffrey點都唔肯講，但就話喺韓國帶咗啲泡菜返嚟，醃好之後可以大家一齊食喎！