稍為篤中佢死穴嘅民望問題，佢形容只係對佢表現嘅評價，故此會尊重、小心聽等，今次唔再講「視民望如浮雲」喇。佢仲呻話做佢個位好難，如果有得揀，未必人人想做咁話。

回應點睇傳媒採訪，煲呔曾呻自己成日有重點，但硬係畀其他事拉開咗，但係佢又懶大方話無辦法啦，會尊重傳媒嘅角度，同之前鬧傳媒完全兩個樣。

其他問題都無令煲呔曾發作。譬如上海建迪士尼，佢就大安旨意叫人唔使太擔心，應該放開懷抱，唔通大股東美國迪士尼會畀上海搶香港生意咩？

被問起貧富懸殊、社會向上流動問題時，煲呔曾即時卸膊話施政報告唔可能濃縮所有問題，而且未來經濟一定係走高增值，所以先提出六大產業，仲話香港唔能夠走番去務農、捕魚。

如果香港嘅現實環境好似佢喺個訪問度咁受到客氣對待就好啦，不過現實係殘忍嘅，喺煲呔曾口中乜都話冇事，佢呃到幾多人，呃得幾耐呢？