社會要求醫委會改革嘅聲音近年不絕於耳，早前監委會以醫學會會長謝鴻興漏報不小心駕駛紀錄為由，取消咗佢嘅業界直選委員資格，就畀人質疑有報復謝鴻興成日批評醫委會之嫌。業界又不滿醫委會長期由被視為親政府嘅麥列菲菲出任主席，容易被政府操控。不過高院日前裁定醫委會取消謝鴻興資格嘅決定違反《基本法》後，麥列菲菲就踢爆其實晨早就提醒過政府有關法例可能有問題，不過周一鑊一直採取拖字訣，先至鬧出今次官司。

職能同醫委會有九成相似嘅護管局，其實亦存在同一問題。前立法局喺臨回歸前參考醫委會組成，修例為護管局引入六名業界直選委員，但當局遲遲都未為相關嘅選舉同上訴程序制訂規則，令法例形同虛設。前衞生福利及食物局局長楊永強曾經喺○三年初，承諾喺該年之內落實有關規則同選舉，但楊永強其後因沙士下台，接手嘅周一鑊就再冇跟進，至今拖足十二年都未有落實時間表。

汪國成翻閹惹非議

麥列菲菲連續做咗醫委會主席十二年，護管局主席亦唔好得幾多，現任主席汪國成名義上喺去年底先上任，但實際上佢之前已經做過呢個位多年，其後受制於政府嘅「六六規定」，先至迫於無奈卸任。估唔到汪國成隔咗幾年過咗一陣冷河，又獲政府「翻閹」重掌護管局，令唔少醫護界人士非議。

本身都係護管局委員嘅李國麟，聽日會喺立法會就護管局嘅組成同委員任期提出質詢，為業界要求改革護管局嘅戰事打響頭炮，估計之後仲會陸續出招。李國麟強調自己已喺局內提過政府從速落實護管局直選，但等咗幾年都冇正面回應，先至決定爆周一鑊大鑊。佢又自爆仲有幾個月就任滿六年，預咗冇得留低，毋須擔心會因為得罪政府不獲續任，自然可以鬧得放啲。