第一大論點：曾蔭權嘅施政報告推出慳電膽現金券，由於涉嫌夾埋老襯搵你老襯，結果搞到滿城風雨人人喊打。即使以最善良嘅心腸嚟一個最仁慈嘅假設，煲呔曾冇蠱蠱惑惑存心利益輸送，喂，成件事係邱局長出謀獻計，家陣累到老頂水洗唔清，嚴重損害政府管治威信，你話佢係咪蠶蟲師爺吖？

第二大論點：撇開曾蔭權益親家嫌疑唔講，淨係集中睇睇慳電膽政策本身，嘩，勁咯，民意一面倒反對，政黨全方位炮轟，邱騰華終於扯白旗投降，成個Project仆到直一直，你話佢係咪蠶蟲師爺吖？

第三大論點：除咗慳電膽之外，睇睇其他環保政策，邱騰華夠膽死喺毫無配套準備之下推銷鬼五馬六嘅電動車，車主得物無所用，因為通街搵唔到充電設施，你話佢係咪蠶蟲師爺吖？

唉，仲話香港六大優勢產業之一係環保喎，三歲細路哥都未必會上當。如果空口講白話居然可以保護環境救地球，咁不如搵鵝頸橋底打小人嘅神婆頂替邱騰華做局長仲好啦，小人打得幾打，話唔定藍天白雲真係會元神歸位。

話時話，蠶蟲師爺係點樣扯白旗嘅呢？就咁，政府派發慳電膽現金券其實係搵全人類埋單找數吖嘛，即係有可能加電費，梗係人人反對啦。結果咯喎，邱騰華喺尋日立法會一個委員會會議裏面宣布，現金券計劃將連同禁售鎢絲燈膽政策一併喺今年底或明年初諮詢，換言之，一切計劃推倒重來。另外，邱局長幾日前先至褪軚，話派發現金券未必會加電費，而且適用範圍唔一定局限於傳統慳電膽，可以擴闊至其他節能產品，例如更加慳電嘅LED燈膽。

唔知大家點諗，功夫茶就覺得好滑稽，原來堂堂一個主理環保大業嘅局長推出政策之前係乜都冇考慮㗎。首先，冇考慮到加電費係幾咁犯眾怒。其次，冇考慮到世界上原來有另一種燈膽更加慳電。仲有，冇考慮到即使真係慳電，唔一定代表慳錢。

咦，乜嘢叫做慳電唔代表慳錢？嗱嗱嗱，係時候等功夫茶提提你，根據利潤管制協議，電力公司係只准賺唔准蝕嘅，如果全香港用電量減少，佢哋有權加價彌補損失。假設大家同心合力使用慳電膽，最終減少用電五成，電力公司可以根據利潤管制協議要求瘋狂加價一倍！

換句說話嚟講，慳電膽計劃就算重新包裝，電力公司今次唔加你價，難保以後唔會當你水魚咁劏。邱騰華一日唔拆咗呢個計時炸彈，唔理送出乜燈膽，結果一樣係攞膽！