覓得第二春嘅立法會議員涂謹申，已定於下月迎娶政治公關蘇麗芬（阿Sue），婚紗相影完，萬事俱備，但邊個做阿涂嘅律師證婚人呢？原來係黨友「鐵頭仁」何俊仁。鐵頭仁做證婚本來無乜問題，但佢尋日就發生咗件遺失文件嘅大懵事件，令人擔心鐵頭仁會喺前往婚禮途中遺失阿涂同阿Sue份結婚證書。
話說財經事務及庫務局局長陳家強尋日喺香港會所設宴，與鐵頭仁及阿涂等多位議員聚會，鐵頭仁走入會所期間，跌咗份文件都唔知。執起一睇，嘩！原來係一份關於泛民主派「五區總辭」嘅新聞剪報，並唔係乜嘢機密文件。鐵頭仁離開時得知遺失剪報後非常愕然，阿涂見狀，就講笑話鐵頭仁透過呢啲不經意手法放料畀傳媒，暗指鐵頭仁係「二五仔」。
不過，鐵頭仁今次咁大懵確實響起警號，事關鐵頭仁幫阿涂做律師證婚人，要一早準備好結婚文件去婚禮現場，萬一中途或去到門口唔見咗就弊嘞，唔通等人執番畀新郎同新娘補簽名咩！