本文重點
煲呔曾曾經誇下海口話會做好佢份工，結果搞邊樣就衰邊樣，隨便數已經有慳電膽、副局長同埋外傭稅，稍為做得無咁差嘅，怕且得三年前成功推動添馬艦政府總部工程，但都係喺爭議聲之中通過。立法會旅遊界代表謝偉俊（Paul）正密謀出手，提出動議要求特區政府煞停添馬艦工程，實行出盡全力，務求令煲呔曾喺任期屆滿前唔能夠大鑼大鼓入主新政府總部。
籲搬啟德舊址
阿Paul已經向立法會申請，準備提出一項叫做「停建添馬艦總部」嘅議案。須知道立法會三年前就批咗錢發展添馬艦，阿Paul今次翻舊帳，佢解釋話係因為特區政府成日話要做亞洲時區嘅國際金融中心，剛好過去一年，得「阿爺」幫手，唔少人民幣業務都開始喺香港落腳。阿Paul認為特區政府有心同新加坡、日本競爭嘅話，就應該留意到中區甲級寫字樓供應緊張。
正所謂前舖後居，阿Paul覺得特區政府無理由自己霸住最靚嘅地皮，所以決定提出呢項動議。佢仲諗埋後路，叫特區政府將總部搬去九龍啟德機場舊址，一來嗰度交通方便，二來可以紓緩紅隧同東隧繁忙時段嘅塞車問題，三來仲可以帶動舊區發展，真係一家便宜幾家着。添馬艦項目工程已經如火如荼，阿Paul都照樣叫停，佢自言唔應該稱為「癡人說夢」，叫做「Think outside the box」就差唔多。
阿Paul嘅老友、金融服務界代表詹培忠，三年前喺財務委員會討論添馬艦撥款時，無參與到表決，換言之即係無贊成、亦無反對。阿Paul話，今次佢提呢項動議，事前無請教過金勞詹，事後向對方提起，金勞詹都話咗會支持，但係覺得有啲嘥氣囉！對於阿Paul呢啲逆耳之言，煲呔曾大搖大擺入伙之日，可能都有啲反省啩。