早幾日之嘛，勞工及福利局啱啱先至好高調咁樣公布另一個工作假期好去處，就係極受歡迎嘅日本嘞。局長張建宗同日本駐港總領事簽署文件，明年一月一日實施，申請人可於日本逗留一年賺取旅費，不過唔可以受僱於同一老闆超過三個月。

工作假期計劃嘅地點仲有冇其他選擇呢？梗係有啦，由二○○一年起，香港先後同新西蘭、澳洲、愛爾蘭以及德國簽署文件，至今已經有超過九千二百人參加。其中一個叫做阿鋒，今年二十八歲，舊年十一月辭去原本嘅印刷廠工作，透過勞工處去咗澳洲交流，不知幾咁逍遙自在，點不知……

唉，世事難料，禍福未卜。今年十月中旬喎，阿鋒同三位同事揸車去澳洲北部旅遊，突然遇上車禍，阿鋒身受重傷。經過搶救之後，阿鋒雖然逃出鬼門關，不過由於傷及脊椎，所以有全身癱瘓嘅危險，家陣只係膊頭以上可以活動咋，慘！

阿鋒嘅家人當然飛撲過去澳洲嘗試救人啦，之但係，人生路不熟，邊個幫到手？最正路梗係搵香港政府，話到尾成個工作假期計劃都係勞工處負責嘅，你冇理由掟咗人哋過去冒險，人哋落難又見死不救啫。再講吖，即使唔係透過官方渠道走出去遊歷，港人流落異鄉，港官點都有義務伸出援手啩。

吖，死得佢吖，唔知係咪見死不救已經成為香港官僚座右銘，繼上次港人滯留泰國遲遲冇派包機救人之後，今次竟然又係闊佬懶理。根據阿鋒嘅孖生細佬阿均所講，分別向勞工處同埋入境處求救，全部好似撞牆一樣：「佢哋話阿哥個人唔喺香港，又話我哋冇買保險所以幫唔到，淨係叫我哋搵當地中國領事館！」

喂，就係因為人哋唔喺香港，先至有需要勞煩特區政府官老爺救命啫，如果人喺香港，使鬼你出手幫拖咩，唔化！

至於講到冇買保險，計起條數又係勞工處失職，原來成個工作假期計劃係冇規定申請人必須購買保險㗎。換言之，勞工處隨隨便便就掟咗人哋過去冒險，然後就任由自生自滅。計計埋埋，有九千二百個香港人上咗勞工處賊船，可能大部分都係冇買保險嘅，萬一出事都唔知點算。

好彩，阿鋒屋企人識得搵東方報業集團求助，經過本報轉介之後，勞工處同埋入境處即時變晒嘴臉，不約而同話極度關注喎，希望為當事人提供協助咁講。

一次係咁，兩次係咁，餐餐都係咁。你以為經過上次泰國事件之後，政府唔會再係咁冷血咩？錯晒啦，香港公務員淨係識得幫自己逆市加薪㗎咋，完全懶得幫市民逆境求存！

話時話，冷血還冷血，勞工處同埋入境處其實仲有少少人性，起碼唔會學似曾蔭權咁，一見到本報轉介就破口大罵「無中生有」。