港大校務委員會早前換咗主席，梁智鴻下月七日將由馮國經手中接棒；尋日政府憲報又公布委任多五名新校董入局，佢哋就係渣打高層洪丕正、恒生一姐梁高美懿、港區人大廖長江、前律師會會長黃嘉純以及政壇後起之秀麥嘉軒。五個人中，洪丕正及梁高美懿都係銀行界話事人，政府委任銀行家入去校務會，莫非想佢哋畀吓意見，等港大開源易啲、籌款能力高啲？
政府憲報尋日公布，五人嘅任期由下月七日開始，為期三年。五名新任校董中，除咗兩位銀行家，其他三人都係專業人士，廖長江同黃嘉純係法律界人士，入港大做校董，可以話搵到一個新政治平台。至於麥嘉軒就係哥哥張國榮嘅姨甥女，佢本身又係畢馬威會計師事務所合夥人，早前先完成經濟機遇委員會嘅工作，依家仲係婦女事務委員會成員，佢仲活躍於智囊團體智經研究中心嘅工作。由細到大喺英國受教育嘅佢，今次獲委任做港大校董會成員，睇嚟前途無量！