本文重點
協成行主席方潤華在香港地產打拚逾六十年，投資眼光之準繩令人嘖嘖稱奇，稱得上地產界老行尊，更有「撈底王」稱號。不過，記得去年金融海嘯肆虐，方潤華與兒子方文雄當時話暫時只敢採取保守策略，不敢貿然入市；事隔一年，方潤華最近再度出招，掃咗兩個「名鑄」豪宅單位，涉資五千五百多萬元。方文雄話，兩個單位並非炒賣用途，希望用作長線投資，現時已經放緊租。
依市場需求作決定
政府「賣大包」放寬工廠大廈用途限制，工廈身價隨即水漲船高，方文雄爆料，話協成行手頭都有工廈，一幢全資擁有，另一幢就與「四叔」李兆基嘅恒基地產共同擁有，兩幢工廈都位於香港仔。不過佢話暫時未有打算向政府申請改變工廈用途，事關唔想好似外界一窩蜂效應去申請改變用途，希望睇定啲市場需求才再作決定。方文雄果然盡得父親真傳，作風夠晒穩健喎！
方文雄現時除咗幫手打理家族生意外，仲抽時間做義工，佢引述父親話，去年金融海嘯目睹富豪大起大落，發現一切只是過眼雲煙，有能力就應該做多啲善事，取諸社會，用諸社會。