立法會尋日第三日辯論煲呔曾五年任內最差嘅施政報告，議事堂儼如批曾大會，罵聲四起，殺氣騰騰，去到最後投票表決致謝動議一刻，發生一單笑料，就係社民連嘅「長毛」梁國雄舉錯手，「支持」向施政報告「致謝」，雖然佢隻彈弓手收得快，不過已經瘀到爆，被泛民同建制派議員同聲噓爆，成為一連三日施政報告辯論中，繼煲呔曾後被人噓得最勁嘅一個。
長毛平日喺議事堂聲大夾惡，鬧人唔使畀面，估唔到自己都有遊魂出醜被噓嘅一刻。話說全體議員表決施政報告致謝議案，由支持嘅議員先舉手，成班建制派議員一齊行動，點知長毛可能太心急要否決動議，人舉佢又舉，立法會同僚見到長毛同建制派打成一片嘅奇景，即刻鼓譟起嚟，長毛亦知揩嘢，閃電縮手之後，將個頭伏喺枱面，有啲唔敢見人咁款，坐喺佢旁邊嘅社民連黨友亦瘀埋佢一份，攞起個微型棺材示威道具，借狀扑向長毛個頭，可能係提醒佢以後帶腦返議會。
投完晒票，長毛嘅失魂繼續被人攞嚟當笑話，立法會主席幽佢一默，話經過三日辯論，只係得一個官員身體不適，同埋一位議員舉錯手啫，即時哄堂爆笑！