培華教育基金尋日喺廣州南沙大酒店搞咗個同金融海嘯有關嘅論壇，請嚟浸大校長吳清輝、城大校長郭位、理大校長唐偉章及科大校長陳繁昌呢四間大學嘅校長發言。吳清輝一嚟就訴苦，話浸大做咗股市大閘蟹，名副其實係金融海嘯受害者。到底浸大入市買咗乜？吳校長苦笑話，押注時「樣樣有啲」，無買殺人不見血嘅雷曼，投資組合睇落算係保守，估唔到咁穩陣都蝕入肉。

浸大投資「血流成河」，校董會成員第一件事梗係「止血」。可惜金融海嘯百年難遇，入市博反彈難如踩鋼線，為免泥足深陷，惟有當機立斷斬纜，將筆錢轉去更保守嘅投資。吳校長無講係咪將基金放入紅簿仔收「雞碎」利息，不過調整組合呢個決定就令佢更後悔。

培華基金淡定有錢剩

事關過去半年全球股市拗腰式反彈，港股亦由萬一點低位彈番上二萬二千點，大笨象亦由低位三十幾蚊反彈上番八十幾蚊。照咁計法，如果浸大當日按兵不動，且繼續喺低位掃貨，莫講話返「家鄉」，直頭可以倒賺幾億銀。難怪得吳清輝慨嘆話，一來一回足足賺少咗十幾億元，認真唔抵！多名與會者趁休息時段行過去慰問吳校長時，吳清輝依然講到咬牙切齒，話賺唔番喎。

相比之下，培華基金嘅財運就旺好多，即使遇上金融海嘯，仍然保持到每年百分之十五嘅投資利潤。逆市保不失，唔通培華獲高人指點？據聞培華基金揸Fit人，不時提醒負責投資嘅揸數人，唔可以投資喺高風險產品上，因為基金筆錢籌集自各方，一分一毫都要小心投資，投資組合咁多年來都偏向保守型。所以話，淡定果然有錢剩！