恒基主席李兆基（四叔）與李家誠兩父子近日為慈善各有各忙，四叔尋日到廣州南沙出席培華教育基金舉辦嘅中國發展論壇，而家誠前日就代表百仁基金遠赴四川彭州市出席「百仁基金希望學校」揭幕禮，間學校係起嚟畀受四川地震影響嘅學生。雖然兩父子相隔咁遙遠，但四叔就遙距開聲敦促家誠加把勁追番個男丁，四叔亦好通情達理，畀新抱徐子淇抖夠先至再開工喎。
卓妮尋日都有到南沙捧四叔場，記得四叔曾經話想子淇生夠五個，過去兩、三年子淇已先後誕下大女晞彤和細女晞兒，問四叔係咪想家誠追多個男丁？四叔笑笑口話：「係呀，佢（家誠）追緊㗎喇，依家要抖抖先，唔會咁快家嘛！」咁幾時開工呢？四叔佢老人家果然好體貼：「普通女人開刀生仔，都唔能夠即刻再來喇，等佢休息一年半載先再來第二個囉！」
籲買物業抗通脹
四叔喺論壇上又同嘉賓分享心得，今次主要呼籲港人在金融海嘯後要慎防美元貶值。四叔話，美金淡，港人持有港元亦被拖累，加上現時存款又無息，可謂焗住畀美國人賺到盡，所以港人為防止資產縮水，可考慮購實物，買地產、物業、揸澳元，總之持有保值嘅資產，就可對抗通脹；聽唔聽四叔，就真係見仁見智喇！
對新股無乜興趣
講到點睇後市，四叔話跌到二萬一千點應該有支持，但近排個市都係上上落落，他會繼續揸住自己原則，唔會買亦唔會沽，佢話：「我同你哋普通人諗法唔同，普通人諗住明日賺錢，後日賺錢，又揸又沽，早一兩年，新股一元升到四、五元，好好世界，但我依家對抽新股已無乜興趣，主力放重在恒基地產方面，因為可以賺兩重。」
四叔解釋，買一幅地回來，地價起又有錢賺，清拆重建出售又賺多重，佢話依家投資地產最啱時候，地產有機會搵大錢，着數過投資股票喎，又係嗰句，大家自己打過算盤先至好做決定噃。四叔投資嘅地產項目中，包括斥資一百億元收購舊樓，佢話重建後可提供幾千個單位，相當犀利；所以，徐子淇生多多都唔怕！
卓妮